دايما بتشتكي يا ابن آدم من الظلم و الجور ..
قوم بص لحالك و لف و دور ..
هتلاقي في الأساس حياتك مشكلة ..
عاوزاك تصلح فيها و تبدأ تثور ..

خدها مني نصيحة
"إن الله لا يغير ما بقوم حتى يغيروا ما بأنفسهم"

وابــــــدأ بنفســـــك ...

Monday, May 17, 2010

و فات كااااااااااااااام يوم .. و لا حس ولا خبر

هوووووووووووووووفففففففففففففففففففف .. إيه التراب إللي على المدونة دا ..

دا الواحد حاسس إنه بقاله مليون سنة ما كتبش حاجة خالص ولا حتى عبّر المدونة ..

بس بصراحة .. أنا مخزن موضوع جديد .. هو مش جديد جديد .. بس جديد :D

*******************************************************

1 مارس 2010

النهارده عندي مشاكل متلتلة في الشغل بجد .. حاسس إني وقعت من إربه مخرومة و محدش استلقفني

حاجة تشل بجد .. كل الناس ماسكة في خناق بعض .. و كل واحد عاوز ياخد حقه غصب عن عين إللي أدامه .. دا أصلا لو اعتبرناه حقه فعلا ..

و كمية الرشاوي إللي نازلة ترف على الموظفين .. والمحسوبية إللي ودتنا ورا و خلت أصحاب الكفاءات في الدرجة العاشرة من المجتمع ..

دا أنا كفاية النهارده لوحده عامل يجي 3 خناقات بس كده على غيار الريق ..

حاجة تفور الدم و تجيب سكر و ضغط ..

3 مارس 2010

هو إيه إللي بيحصل في الدنيا دا؟!!

اليهود بيعاملونا كإننا لبانة في بقهم ..

أقصى مين دا إللي هيتهدم؟!! ..

عاوزين يهدوه يوم 16 مارس .. و إشمعنى يعني التاريخ دا بالذات؟!!

مممممم .. لازم أبحث طبعا .. أومال هفهم منين الكلام المتنيل على عينه إللي بيتقال دا ..

أهاااا .. دا اليوم إللي اتقتل فيه بطل عندهم .. عاوزين يجيوا اليوم دا يعني بهدم الأقصى ..

لا لا .. الأقصى يتهدم .. مستحيــــــــــــــــل .. دا الواحد كان هيربي أولاده إللي مش راضيين يجوا دول على حب الأقصى و الدفاع عنه ..

بس هو حد عارف .. يمكن المسجد يتهدم فعلا قبل ما ولادنا يكبروا ..

إن مكناش إحنا إللي هنعمل حاجة .. أومال مين إللي هيعمل؟!! ..

هنفضل مستنين لحد ولاد الـ ….. ما يهدموا مسرى الرسول صلى الله عليه و سلم؟!! ..

لحد إمتى؟ّ!! .. لحد إمتى بجد ؟!! ..

10 مارس 2010

أنا خلاص بقى .. نويت أنزل في مظاهرة من مظاهرات الجامعة و اتكلم معاهم عن حق الأقصى ..

ما هو أنا مش هفضل راس كرنبة في القاعدة كده .. لازم أعمل حاجة بجد ..

لا .. أنا هلم العيال أخواتي و أمي وأبويا و أكلمهم على المشكلة عشان يحسوا بيها أكتر ..

دا أنا أمي ربنا يهديها لسه عاملة حتة خناقة إمبارح مع الجيران ما يعلم بيها إلا ربنا .. كل دا عشان كيس الزبالة ربنا يسامحه ..

و حسنية و بهيجة لازم يفهموا القضية ويدرسوها كويس عشان يحسوا بالواقع إللي إحنا عايشينه وميفضلش عقلهم صغير للدرجة دي ..

يا ترى هقدر .. أيوه هقدر بإذن الله .. يااا رب

12 مارس 2010

قعدت مع أسرتي و كلمتهم بوضوح و صراحة عن المشكلة .. أبويا طبعا اتكلم كتير أوى .. و أمي كل إللي عليها “بلاش نفتح عين العيال على الكلام الكبير دا” .. لو ما اتفتحش عينيهم دلوقتي .. بكره هتتفتح غضب عنهم لما يلاقوا نفسهم زي فلسطين ..

بس كلام أبويا كان كويس و محترم .. يعني قال إننا لازم نتجهز بالسلاح و بالعدة عشان نواجه أعداء الإسلام دول .. لازم نقف واقفة جامدة ونعرفهم إننا مش ساهلين أبدا ..

لكن .. هنقف الوقفة دي إزاي؟!! .. إحنا لا عندنا سلاح .. و لا عندنا جيوش مجهزة لحرب زي دي ..

و بعدين هل الحكومات أصلا هتقبل بأمر زي دا ..

الموضوع معقد أوى .. بس كل إللي أنا حاسس بيه دلوقتي إن القضية لازم ننشرها بكل الطرق ..

و أحسن ما في الموضوع إن الشارع بقى مشغول بالقضية دي ..

يعني عندنا في الشغل الناس هديت شويه عن الخلافات دي .. و بقوا يقروا الجرايد لبعض و يحاولوا يحللوا القضية دي بأشكال مختلفة ..

بس فين الحل؟!! ..

ضروري في حل  ..

بس هو فين دا بس ؟!! ..

14 مارس 2010

ما شاء الله لا قوة إلا بالله .. كل الدعاة بيتكلموا عن حقوق الأقصى و إننا لازم نعمل حاجة للأقصى ..

فعلا الأمة دي عاوزة دعاة دمهم حامي و يعمل حاجة للإسلام ..

بس دا فاضل يومين بس ..

إيه إللي هيجرى و إيه إللي هيحصل بالظبط؟!! ..

أنا خايف .. أنا مرعوب ..

يا رب  .. يا رب الأقصى ما يتهدمش يا رب ..

لو الأقصى اتهدم يبقى القضية كلها اتهدمت ..

يا رب ..

يا رب ..

16 مارس 2010

اليوم الموعود ..

إيه إللي بيحصل بجد دلوقتي ..

الناس ممنوعين من دخول المسجد .. وقوات الاحتلال عاملة شبكة مغطية المسجد عشان محدش يعمل أي حاجة ضدهم ..

هل اليوم دا هيعدي على خير بجد؟!! ..

مش عارف ..

بس بجد باتمنى من كل قلبي يعدي على خير ..

أنا هقوم أصلي ركعتين لله .. و ادعيله .. هو المنتقم الجبار ..

17 مارس 2010

هو لعب عيال و لا إيه؟!! ..

قالوا هنهدمه .. و ما هدمهوش برضو ..

يا دي العبط إللي على الصبح دا ..

الواحد طول الليل مش عارف ينام حرام عليكم ..

ما تريحونا بقى ..

19 مارس 2010

برضو و لا حس و لا خبر ..

و لا قناة إخبارية بتقول حاجة عن الأقصى ..

كلها أخبار عادية عن قتلى و جرحى ..

الناس نسيت القضية و لا إيه يا ناس ..

لا حول ولا قوة إلا بالله ..

30 مارس 2010

الله يخرب بيت الخناق .. على إللي بيدأ بالخناق ..

هما الناس دول معندهومش غير الخناق ..

الشغل بقى مكان كئيب بجد ..

ليه يا أبويا شغلتني في المكان الغريب دا ..

يلا بقى أهو مكان ناكل فيه عيش و خلاص ..

2 إبريل 2010

والواحد حياته متلخبطه ..

من شويتين كانت قضية الأقصى هي كل حاجة بافكر فيها ..

بعدين الشغل اتقلب و فيه مشاكل لا حصر لها ..

و دلوقتي أمي جايبالي عروسة ..

وقته دا يا أمي .. مش لما نشوف الخيبة القوية إللي أنا فيها دي ..

يا رب فك كربي يا رب العالمين ..

5 مايو 2010

إيييييييييييييييييييييييه !! .. دنيــــــــــــــــــا

توفي إلى رحمة الله الحاج مرسي صاحب القهوة إللي قصدنا

و لا دايم إلا وجه اللـــــــــــــه

15 مايو 2010

بمبي بمبي بمبي

أنا مبسووووووووووط أوى أوى أوى

الحمد لله

الواحد كان فين و بقى فين ..

……………… 2010

……………… 2011

………………2012

……………………

……………………

……………………

و الأيام كلها بقت شبه بعضها ..

فين بقى الأقصى .. و فين الاهتمام الرهيب بالقضية زي الأيام إللي فاتت ..

نسينا القضية تاني و هنرجع لمشاكلنا وهمومنا وحياتنا ..

حتى دعاءنا للأقصى قل .. و نسينا إن مسرى الرسول صلى الله عليه و سلم في خطر ..

يا ترى يا هل ترى اللي بيحصل دا اختبار لأمة محمد؟!! ..

و لا صحوة عشان نعود تاني للتفكير في القضية؟!! ..

يا ريت القضية تبقى في دمنا و حياتنا أكتر من كده ..

مش مجرد إن اليهود عملوا فرقيعة نهييييج و نصييح و نقول حقي برقبتي ..

و لما يسكتوا نسكت إحنا كمان ..

لازم نكون معتمدين على أنفسنا أكتر من كده .. غير متبعين لأفكار اليهود و تخطيطاتهم ..

إن كانوا المرة دي هوشوا و معملوش حاجة .. المرة الجايه هتبقى بجد ..

لازم نستعد من دلوقتي قبل ما يجي اليوم و نقول .. إيييييييييييييييييه .. دنيــــــــــــــــــــا

2 comments:

يـــــــلا نتغـــــــير said...

السلام عليكم
حمد الله على السلامة
ام هند الاقصى انا مشفتش حد اهتم بالموضوع ده خالص غير اسرتى وصديقه ليه ده حتى انا كنت هكتب مقاله فى المجله بتاعت المدرسه بتاعتى بس رفضوا عشان السياسه للاسف المجتمع باظ وللاسف انا مبقتش اشوف غير عيوبه مش لاقيه فيه مميزات الناس بقت مش طايقه بعض كل واحد بقه يقول يله نفسي حتى اصحابى مش بعرف اتكلم معاهم كنت بكلم مع واحده صحبتى على المسيخ الدجال مكنت عرفاه الناس بقت عيزه حاجه واحده (الفلوس) الا من رحم ربي المهم انا بشكرك جدا على القصص اللى انت بتكتبها لانها بجد بتشجعنى انى اكتب وشكرا كمان مرة
السلام عليكم

المشكــــ فين ــــلة؟ said...

و عليكم السلام و رحمة الله وبركاته
ممكن يكون في الدنيا شر .. لكن مش معنى كده إن كل الدنيا شر
في ناس كتير أوى بتحب الفلوس .. لكن مش معنى كده إن كل الناس الفلوس أكبر هم عندها
ممكن يكون ناس كتير متجاهلين القضية .. لكن مش معنى كده إن كل الناس متجاهلة القضية

تفاءلي .. مهما حصل هنفضل أمة عزيزة و قوية ..لو ما ظهرش دا دلوقتي .. هيظهر بعدين بإذن الله ..
و يكفي وجود الكثير و الكثير من الفضائيات والبرامج الجميلة إللي بتنمي تفكير الواحد و تجعل منه انسان سوي ..

أنا سعيد إن رغم صغر سنك بتكتبي .. و أتمنى أشوف لك كتابات جديدة
و الإجازة جت خلاص .. حاولي تستثمريها بقدر الإمكان .. الواحد بعد ما كبر و أتخرج حس فعلا إنه كان مرفه في وقته كتير أوى .. و أكتر وقت كان الواحد بيستفيد بيه و بينمي نفسه فيه هو الوقت إللي إنتي فيه دلوقتي
لكن دلوقتي الواحد بيحاول لكن للأسف مش نفس النتيجة .. بسبب ضيق الوقت و المسئولية
ربنا يوفقك
و عليكم السلام و رحمة الله وبركات