دايما بتشتكي يا ابن آدم من الظلم و الجور ..
قوم بص لحالك و لف و دور ..
هتلاقي في الأساس حياتك مشكلة ..
عاوزاك تصلح فيها و تبدأ تثور ..

خدها مني نصيحة
"إن الله لا يغير ما بقوم حتى يغيروا ما بأنفسهم"

وابــــــدأ بنفســـــك ...

Tuesday, January 5, 2010

اتحـــــادنا راح فيـــــــن؟

185263797

- يا مغاوري البس بقى لأحسن هنتأخر على الفرح

دي كانت أمي بتنادي عليا عشان نروح فرح بنت خالي باتعة ..

بصراحة .. أنا مش عاوز أروح .. و غصب عني رايح عشان أمي قالت لي لازم تروح و نسلم على الأقل عشان ما ياكلوش حقنا في ميراث جدك الله يرحمه ..

هو جدي مات من هنا .. و خالي الكبير مقشط على كل حاجة .. دا حتى الكبانيه القديم إللي كان جدي هيرميه .. خده و خباه عشان منعرفلوش طريق جره ..

طبعا أمي ربنا يخليهالي قالت لأ .. إحنا لازم نروح فرح بنت خالي الكبير دا عشان يعرف إننا معاه .. بس يدينا حقنا في الميراث بدل ما نروح للمحاكم و الذي منه و نخلص من بعد للأبد ..

أم هند .. روحت لبس تهدومي و اتشيكت و لا كإني أنا العريس .. و روحت أنا و أمي و العيال المقاريض أخواتي و قلنا يلا .. اعمل الخير و خلاص ..

الفرح يا خويا إييييييه .. و لا أجدعها مأمور قسم يعمله .. فارشين الشارع من أوله لآخره .. والبت أختي بقت عينيها هتطلع على الأكل .. قال يعني ما بتاكلوش أم زور واسع دي .. من ساعة عملية اللوز و هي بتاكل أكتر ما بتتنفس ..

بس كان فرح أبهة بصحيح .. و صارفين عليه ياما .. دا كله من ميراث جدي يا ...... يلا ما علينا .. هناخد حقنا إن شاء الله بالدراع ..

قعدنا في وسط الناس إللي أنا معرفش منهم حد خالص .. و أمي قاعدة تسلم مع اللي رايح و اللي جاي .. و أنا مش عارف هي حفظت الأسامي دي كلها منين بصراحة ..

و كل ما أسألها على حد .. يطلع جوز خالة بنت عم جدة أم ابن عمتي .. حاجات غريبة و كلها من نفس القطعية .. الناس دي كلها جايه ليه صحيح ... ربنا يستر و ما يتقلبش الفرح جنازة ..

أنا قلت أسأل أمي يعني هما دول كلهم جايين ليه .. قالت لي تورتاية و كل واحد عاوز ياخد له لحسة .. طبعا أنا بهيم بعيد عنكم .. فقلت لها يعني إيه ؟؟ .. أمي بفصاحتها قالت لي: يعني كل واحد عاوز يجامل خالك عشان ما ينساهوش في الميراث .. ما إنت عارف إن جدك كان عنده شيء و أشويات .. عمارات إيه و دكاكين إيه و ورش إيه و مصانع إيه .. يعني التركة دي لو اتقسمت علينا بالعدل مفيش حد في العيلة هيبات من غير عشا يا واد ..

أنا سكتت و قلت لنفسي أحط جزمة في بقي أحسن أمي لو فتحت السيرة مش هتخلص ..

راحت أمي ربنا يخليهالي فقعت زغرودة .. إيه دا أمي بتعرف تزغرد كمان .. دا الفلوس ياما بتعمل يا عالم ...

بس عرفت بعد كده إن العروسة جت من عند الكوافير فهم بيستقبلوها بما لذ و طاب من الزغاريد و الأفراح و الليالي الملاح و هلم جره ..

طلعت العروسة مع عريسها في الكوشة .. و الناس كلها قايمة ترقص .. في إيه يا جدعان .. دا الكل بيرقص مع خالي مش مع العريس و العروسة أصلا .. لا حول ولا قوة إلا بالله .. هو إيه إللي بيحصل في البلد دي يا جدعان ..

أمي راحت زغداني و قالت لي قوم ارقص مع خالك ..

طبعا أنا كان هيجيلي شلل .. أرقص إيه يا حاجة .. أنا مش جاي أشحت من حد حاجة عشان أقعد أرقص و اتنطط كده .. و كل دا عشان فلوس .. يا خي إيه ...

أمي طبعا قعدت تزغدني بكلام مالوش لازمة .. تعليم إيه إللي اتعلمتوه دا .. دا مكانش كاريليوس (قصدها بكاليريوس يعني بس أمي على أدها) تجارة إللي أخدتوه دا عشان ما تسمعوش كلام أمهاتكم .. و كلام من دا بقى أشكال و ألوان

قوم إيه يا خوانا .. فجأة راحت واحدة جنبنا شكلها كده بيلسن علينا .. راحت قالت في ودان أمي تقريبا .. ناس معندهاش حصوة ملح في عنيها .. جايين الفرح و متشيكين .. ألا ما عملتوها مع ابني .. صحيح إللي له ظهر ما يتضربش على بطنه

طبعا أمي ربنا يخليهالي ما سكتتش .. قامت و شاحت و ماحت على الست التانية دي إللي فهمت بعد كده إنها مرات خالي التاني .. ما هو بعيد عنكم أنا معرفهومش من بعض .. ولا هما كمان يعرفوني تقريبا .. آخر مرة زورتهم كانت في العيد إللي قبل الهجرة على طول .. أم هند .. نكمل الحدوتة ...

أمي راحت فرشت الملاية و قالت لها .................................. "الرقابة قطعت الكلام لسوء الألفاظ و العبارات الموجهة إلى الأعداء"

طبعا أنا قعدت أهدي في أمي و أقول لها .. يا ماما أرجوكي خلاص .. دا فرح إحنا جايين نفرح مش نتخانق

أمي ردت و قالت: و ماله لما نتخانق .. ما هي الناس خلاص مبقاش ليها كلام غير إللي بيسم البدن

مرات خالي ردت طبعا .. بدل ما تتشطري عليا كده .. روحي اتشطري على أخوكي إللي مانع عننا ميه و هوا .. دا من يوم ما مات المرحوم جوزي و أنا تايهة على علاج العيال وعلى تعليمهم .. حرام عليكي يا شيخة يا مفترية ..

الدمعة كانت هتفر من عيني و الله ... بقى أنا ليا ولاد خال فقرا و معندهومش ياكلوا و لا يتعالجوا حتى .. إيه الزمن إللي إحنا فيه دا يا ربي ؟؟!!!

أمي طبعا ربنا يخليهالي فتحت على السابع .. و إنتي يا وليه ساكتة ليه على حقك .. إنتي مش خلاص جوزتي الواد و العيال التانين لسه صغيرين .. شايلة هم إيه بقى

لا يا أمي بجد مالكيش حق .. دا الست شكلها غلبان أوى .. دا حتى ممعهاش فلوس تجيب جلابية جديدة غير اللي هي لابساها .. الجلابية زي ما تكون مخيطاها يجي أربع خمس مرات عشان تعرف تمشي فيها .. بجد حرام عليكي يا أمي

مرات خالي إللي عرفت مؤخرا إنها مرات خالي و معهاش فلوس هي و عيالها قامت نطت على أمي و رمتها على الأرض و قعدت تضرب فيها .. و كرسي في الكلوب يا معلم .. الناس كلها اتلمت و الللي معرفش عرف .. و خالي إللي ربنا يسامحه قام وقف الرقص و الزمر .. و طرد مرات خالي و عيالها و أمي و أنا و إخواتي من الشارع و قالنا ما أشوفش وشكم هنا تاني .. عيلة تجيب ضغط دم .. عيلة مقرفة ..

و شويه و لقيت كل قرايبنا خارجين من الفرح يشتموا في خالي و إللي جابوا خالي .. و كل الناس ضربت خناق مع بعض ...

طبعا روحنا و إحنا راجعين بخف حنين .. و تقريبا حنين كان عشمان في الخف فمرضيناش نديهوله لأحسن نرجع بإيدينا فاضية ..

أول ما دخلنا من الباب أنا و أمي و إخواتي .. لقينا أبويا – إللي رفض يجي معانا عشان عارف إللي هيحصل بالظبط – قاعد على الكنبة و بيقرا الجرنال و قالنا: رجعتوا بدري يعني .. و إنتو ليه متبهدلين كده؟!!!

قلت في غيظ: زي ما كنت متوقع يا أبويا .. الفرح اتقلب لميتم

أبويا ضحك باستهزاء: مش قلت لكم .. طول ما أمك فيها مفيش حاجة هتعدي بخير

أمي انفجرت في وش أبويا و قالت: يعني إيه يا خويا .. هو أنا كنت باعمل دا من دماغي و عشان مصلحتي .. ولا عشان مصلحة العيال و مصحلتك .. دا إحنا لينا يجي مليون جنيه في الميراث كله .. فاهم يعني إيه مليون جنيه .. يعني عز و نغنغة .. يعني العيال ياكلوا نضيف و يلبسوا نضيف .. يعني مفيش جمعيات تاني .. يعني مفيش سلف تاني ... فاهم يا حنفي و لا مش فاهم؟!!

أبويا بص لأمي بغضب و قال: و الله يا نبوية مفيش حد هيجيبنا ورا غيرك .. أكيد اتخانقتي زي كل مرة تعملي فيها حمامة سلام .. ثم الفلوس إللي في الميراث دي لو حقنا هناخده هناخده من غير كتر كلام .. و لو مخدناهوش في الدنيا هناخده في الآخرة بإذن الله .. فاهمة ولا مش فاهمة...

أبويا بص لأمي بغيظ و غضب .. فأمي اتهدت شويه كده .. و بعدين قالت له: يا سيد الناس أنا مش قصدي .. إنت مالي علينا حياتنا كلها .. بس و فيها إيه لما ناخد حقنا .. و فيها إيه بس؟؟

أبويا راح رادد عليها و أفحمها: حقنا دا هيخسرنا بعض .. هيخليكي إنتي و إخواتك كل واحد في حتة شكل .. هتتفرقوا و إنتو مش أد الفرقة .. بكرة لما حد من العيال يبقى عاوز يتجوز بنت خاله و لا ابن خالته .. ساعتها هتعملي إيه .. هتقوليلهم مينفعش عشان إحنا متخانقين .. لما ابنك يبقى عاوز يعمل مشروع و عاوز حد يشاركه .. يطلع بره و يتمرمط و لا ممكن يعمله مع أهله و حبايبه إللي بيخافوا عليه و علينا .. مشكلتك يا نبوية إن دماغك على أدك و بتتعاملي بتلقائية و خلاص ..

راحت قالت له أمي: يعني إيه تلكائية دي يا أبو مغاوري؟

أبويا رد عليها: تلكائية .. دي حاجة كده زي الرز بلبن يا ختي

أظهرت أمي علامات الفهم و الإدراك التي أعتقد إنها بكده فهمت يعني .. أمي دي طيبة أوى بس للأسف مش فاهمة مصلحتها فين .. بتجري ورا الفلوس و الجاه .. وبتنسى إن دا كله نعمة من عند ربنا و مش هيفضل لها غير إخواتها و حبهم ليها ...

بعد ما هديت الأمور و غيرنا لبسنا إللي اتبهدل دا .. لقيت أبويا بيفتح قناة الأخبار اللي متابعها على طول .. و لقيت المذيعة إلاهي يخليهالنا بتقول

"أطفال غزة في مأساة .. يشجبون العالم العربي عن موقفه السلبي تجاه القضية .. و العالم العربي ينظر لهم بدهشة و لا يتحرك تجاه القضية بشكل إيجابي"

فهمت ساعتها إحنا ليه مبنعملش حاجة تجاه غزة و فلسطبن .. و إزاي احنا وحشين في قلب بعض ...

فهمتو و لا أشرح من الأول؟!!!

1 comment:

يـــــــلا نتغـــــــير said...

السلام عليكم
الاتحاد اتلغى من القاموس بقت كلمه مهجورة عند الناس الا من رحم ربى وربنا يرجعلنا اتحدنا من تانى
اميييييييييييييييين
سلوى السيد